I am Spartacus

Nýr liður hér á bloggnum: Af aulum

2012-01-03T12:53:00.001+01:00

Maður á að vera í tengslum við tilfinningar sínar, ekki skammast sín fyrir þær eða vera í felum með þær. Ég ætla að koma úr skápnum með þetta. Fólk getur pirrað mig óendanlega mikið. Nú ætla ég að tjá þessar tilfinningar mínar með stolti og eigna þeim lið hér á bloggnum. Við getum kallað hann Af aulum.

Hér kemur fyrsti aulapistillinn:

Ég þoli ekki fólk sem keyrir með þokuljósin kveikt þegar engin þoka er. Til hvers? Þetta er eins og að taka upp á því að keyra alltaf með stefnuljósin á eða rúðuþurrkurnar í gangi. Á þetta að vera eitthvað töff. Varla, því þetta er átakanlega hallærislegt...

...aular

Barbro brew

2011-12-29T15:30:00.002+01:00

Eins og ég gat um fyrir nokkru erum við að brugga bjór í kjallaranum á fjóló. Við köllum hann Barbro (sem er sænsk útgáfa nafnsins Barbara). Við við höfum opnað bloggsíðu sem sérstaklega er tileinkuð bjórnum og brugguninni. hérna http://barbrobrew.blogspot.com/

betrireykjavik.is

2011-10-27T23:37:00.001+02:00

Fyrir nokkrum dögum var hleypt á netið nýrri og bættri útgáfu af Betri Reykjavík. Þetta er hugmyndavettvangur til að bæta borgina okkar og mun, ef staðið verður við stóru orðin, geta haft áhrif á ákvarðanatöku í borginni. Vefurinn snýst um að fólk kemur með hugmyndir og sem svo er hægt að ræða og gefa atkvæði sitt. Í lok hvers mánaðar verður fimm vinsælustu hugmyndum gefið pláss á viðkomandi vettvangi innan borgarkerfisins. Þannig geta notendur vefsins haft bein áhrif á dagsskrá nefnda og sviða. Þetta er frábært framtak.

Ég er sérlega áhugasamur um að gera Reykjavík að betri borg og hef talsvert beitt mér þarna inni og var um langan tíma tillaga mín um að fjölga sölustöðum strætómiða í fimmta sæti. Sem þýðir að hún yrði send til umfjöllunar, væntanlega í stjórn Strætó.

Mér sýnist hún vera að lúta í lægra haldi fyrir hugmynd um að strætó gangi fram yfir miðnætti alla daga, sem er svo sem ekki síðri hugmynd. En mikið væri nú gaman að sjá hugmyndina mann tekna til umfjöllunar.

Hér má sjá fimm efstu hugmyndirnar þessa stundina:

Þriðjudagur: Næs

2011-09-27T12:56:00.000+02:00

Össur Skarphéðinsson var svalur á fundi allsherjarráðs Sameinuðu þjóðanna í gær. Hann fjallaði um þróunaraðstoð og umhverfismál og framlag Íslendinga til þeirra málefna og hann lýsti því yfir að Íslensk stjórnvöld styddu stofnun sjálfstæðs ríkis Palestínumanna. Það var djörf (en að mínu mati sjálfsögð) yfirlýsing og gengur lengra en flestir kollegar hans í nágrannaríkjum okkar þora að gera. Með þessu stillir Össur okkur Íslendingum á þann stall sem ég vil sjá okkur vera á í augum ríkja heims, sem friðelskandi og umhverfisvæn þjóð sem beitir sér fyrir mannréttinum og gegn misrétti, óháð skoðunum ráðandi ríkja. Ég vona Össur og komandi ráðherrar muni halda okkur á þessum stalli að þessi tónn muni óma frá Íslendingum um komandi framtíð.

---

Annars var búslóðin okkar sótt í morgun svo nú er eiginlega allt klárt fyrir flutning frá Svíþjóð. Nokkur tilhlökkun að flytja, svona þannig séð. Þó í aðra röndina langi mann ekkert að yfirgefa Svíþjóð. En það er ekki á allt kosið.

Undarlegar afleiðslur

2011-09-18T21:22:00.000+02:00

Það er margt skrítið í þessum heimi og sumt jafnvel ofar mínum skilningi. Mér finnst til dæmis óskiljanlegt að ef ég t.d. gagnrýni skilaboðin sem felast í þessari mynd

sé hægt að túlka það á þann veg að ég vilji að konur eigi frekar að líta svona út:

Ég einfaldlega fatta það ekki.

Íslenska þrjóskan

2011-09-16T17:05:00.000+02:00

Jæja, það þurfti að koma til þess að Bandaríkjamenn beittu þvingunum vegna hvalveiða Íslendinga. Sama hvað mönnum finnst, hvort það sé vottur um hræsni eða tvískinnungshátt Bandaríkjamanna, hvort þessar veiðar séu löglegar skv. einhverjum skilgreiningum og veiðarnar sjálfbærar eða hvað fólki finnst um hvalveiðar yfir höfuð, er sorglegt að það hafi þurft að koma til þessa. Vegna þess að þessar veiðar virðast engu raunverulegu máli skipta fyrir Íslendinga.

Mér virðst málflutningurinn mestmegnis snúast út á að Íslendingar eigi rétt á að veiða hvali í eigin lögsögu og að önnur ríki hafi ekkert með að vera að skipta sér af því. Og ef önnur ríki skipta sér af því, þá verða menn enn þverari í þessari afstöðu sinni, og dettur ekki í hug að gefa sig, í einhverri undarlegri þrjósku sem blásin er upp af ömurlegu þjóðarstolti.

Og nú hótar Bandaríkjaforseti okkur og þá er nú viðbúið að þetta lið sýni enn meiri þvermóðsku og neiti nokkurn tíma að gefa sig.

Annars er stórundarlegt að ríkisstjórn, þar sem sjávarútvegsmál eru undir stjórn svokallaðs græningjaflokks, skuli halda hvalveiðum til streitu og, ekki nóg með það, verja þær fram í rauðan dauðann.

Obama waives sanctions on Iceland whaling

Búnsósulandið

2011-09-15T22:13:00.002+02:00

Ég nenni ekki að gagnrýna íslenska fjölmiðla. Bendi þess í stað á stórgóða fjölmiðlarýni Marra á Smugunni. Nei, ég ætla þess í stað að fjalla um hina stórgóðu fjölmiðlun hér í Svíþjóð. Svíar eru meistarar í gerð sjónvarpsefnis og skarar þar sænska ríkissjónvarpið (SVT) framúr. Umræðuhefðin hér í Svíþjóð er nefnilega upplýst og gagnrýnin samræðuhefð, eins og ég hefi nefnt áður á þessum bloggi, þar sem hlutirnir eru ekki bara málaðir svart og hvítt heldur reynt að nálgast viðfangið frá mörgum hliðum.

Ég get, og mun, fjalla um nokkra þætti í sænska sjónvarpinu sem íslenskt fjölmiðlafólk getur tekið sér til fyrirmyndar en nú ætla ég að fjalla um einn þátt sem ég sá um daginn: Landet Brunsås, sem mætti kalla Brúnsósulandið á gamla góða. Þættirnir snerta kannski ekki íslenska þjóðarsál beint, enda fjalla þeir um sænska matarmenningu. En það er þó margt sameiginlegt með sænskri og íslenskri matarmenningu, t.d. gengdarlaus kjötneysla og áhersla á unnar matvörur. Í þættinum er kafað í matarmenningu landans, ráðist á mýtur og hlutirnir settir í samhengi. Þetta er þjóðfélagsgagnrýni sem kemur við kauninn á fólki því ráðist er á allt að heilaga stund á hverju heimili, kvöldmatartímann og persónulegar venjur.

Þessir þættir eru ágætis dæmi um ákveðið stef sem er áberandi í sænskum fjölmiðlum: Beitta samfélagsgagnrýni.
Svíar virðast óþreytandi við að benda það sem miður er og betur mætti fara. Þeir spyrja sig í sífellu: Er þetta rétt, er þessu best hagað svona, getum við gert betur, hvers vegna eru hlutirnir svona? Samt sem áður, og líklega þess vegna, búa Svíar í einu huggulegasta og öruggasta samfélagi veraldar. Það er ekki vegna þess að þeir séu svo óskaplega ánægðir með sjálfa sig og nota hvert tækifæri til að upphefja sig (slíkt er beinlínis bannað samkvæmt óformlegum venjum samfélagsins). Nei, þeir gagnrýna hátt og snjallt, og ekki með því að rífast um hlutina, nei, heldur ræða þá. Þetta mega Íslendingar temja sér og íslenskir fjölmiðlar ýta undir.

(En auðvitað eru Svíar óskaplega ánægðir með sig sjálfa í laumi.)

Hér er svo linkurinn á þættina. Veit svo sem ekki hvort hægt sé að horfa á þetta fyrir utan Svíþjóð.

Tack fyrir.

Önnur færsla sem lenti í Drafts:

2011-09-08T13:25:00.000+02:00

Kona í síðum kjól stendur á brúnni og horfir hugsandi niður í grábrún síkið. Við hliðhennar stendur sonur hennar, fimm ára á að líta og borar í nefið. Maður á hjóli reykir pípu. Heldur með annari hendi við stýrið en heldur á dagblaði í hinni. Bátur liðast hjá, fagurgulur með, nýlega málaður.

Ég sit við skrifborðið á þriðju hæð og fylgist með út um gluggann.

Svona er dagar mínir, sjúkir en fagrir.

Gömul færsla sem ég fann í drafts:

2011-09-08T13:24:00.000+02:00

Hér er skítkalt. Sem er gott. Ég kann ákaflega vel við kulda, það er sé ég í stakk búinn fyrir hann. Það er ósköp notalegt að þeysast um á hjólinu og finna kuldann bíta í kinnarnar á meðan aðrir partar líkamans eru vel varðir gegn honum. Þökk sé vetrarjakkanum góða, hlýjum gallabuxum, vetlingum og húfu var ég eins og grænn riddari á brúna fáknum mínum. Á svona dögum er Amsterdam sérlega falleg.

Ég reit grein um þjóðsönginn á selluna í dag. Hafði svo margt að segja að ég náði ekki að segja allt sem ég vildi segja. En ég segi það bara seinna. Annars hef ég bara fengið heilmikið respons vegna greinarinnar, sem er gott

Góður dagur, annars, hófst á kvikmyndinni Incident at Loch Ness sem Zak Penn leikstýrir og fjallar um Werner Herzog sem leikur sjálfan sig í myndinni. Eitt orð (svo ég vitni í MVB): Brilljant!

Svo hitti ég hina huggulegu Jóhönnu frá Svíþjóð á bókasafninu hvar við sátum og lærðum saman, sem var gaman.

Í kvöld verður horft á Weapons of Mass Deception.

Góðar stundir

Haustverkin

2011-09-07T14:44:00.003+02:00

Það er farið að hausta og á þessum tíma hefst nýr kafli eins og vanalega. Þá fer maður að setja sér markmið og heit af ýmsu tagi. T.d. er ekki óalgengt að bloggarar ákveðið að fara að blogga meira og breyta útlitinu á bloggnum sínum og henda inn nokkrum færslum með litlu millibili, kannski í eina til tvær vikur. Þetta hef ég gert á hverju ári og verður ekki brugðið út af vananum nú. Svo hér koma hinar árlegu breytingar á ritstjórnarstefnunni.Á ritstjórnarskrifstofunni hefur verið ákveðið að auka við efnistök á þessum bloggi og verður nú í vetur helgað eftirfarandi, ekki í neinni tiltekinni stigsröð:

Bjórbruggun
Í afmæligjöf frá Jóhönnu fékk ég m.a. bók um bjórbruggun. Ég hef verið að blaða í bókinni og hún virðist stórgóð, skýr og skemmtilegt og blæs í mann áhuga og innspírasjón. Mun ég skrá niður bruggkladdann hér.

Málfræði
Eins og ávallt verður fjallað um mál, málnotkun og málfræði. Jafnvel þýðingar og staðfæringar.

Umhverfismál
Röflað verður um umhverfismál og sjálfbærni eins og kostur er.

Nói
Uppvöxtur drengsins mun jafnvel fá sitt pláss.

Önnur málEftir því sem ástæða er til. En reynt verður að halda sér við meginefnistökin hér að ofan.

Svo þið lesendur þessa bloggs hafið til margs að hlakka og er ég viss um að umræðan í ummælakerfinu verði líflegri en nokkrusinni fyrr.

Talið

2011-09-06T21:01:00.002+02:00

Við feðgar fórum yfir tvívaramælt lokhljóð, fráblásið og ófráblásið í dag. Drengurinn hafði þó meiri áhuga á að æfa tvívaramælt sveifluhljóð. Gengur betur næst.

Hvað kostar hvert smit?

2011-09-06T10:35:00.000+02:00

Sprauti sig inni á miðstöðinni - mbl.is:

'via Blog this'

Þessu ber kannski ekki að fagna. En þetta er líklega þarfaverk. Annars er biturt að þurfa í lokin að rýna í hvað hvert smit kostar, samfélagið í peningum. Ekki nóg með ógæfu viðkomandi sem smitast. It's all about the money.

Krummi

2011-08-07T19:34:00.000+02:00

Oft er talað um hvernig internetið hefur breytt samskiptum fólks. Um netið getur fólk átt í samskiptum á milli landa og heimsálfa án þess að þekkjast nokkuð í raunheimum. Þannig geta myndast sambönd og heilu kunningjahóparnir sem hafa aldrei hist. Það er óþarfi að fara nánar út í þá sálma, en mér er þetta ofarlega í huga núna, því nú um helgina bárust mér fregnir af því að einn slíkur „netkunningi“ minn hafi farist af slysförum fyrir fáeinum dögum.
Þrátt fyrir að ég hafi í raun aldrei hitt hann í eigin persónu slógu mig tíðindi sárlega. Því við höfum í um átta ár átt í nokkuð tíðum samskiptum, í ummælakerfum bloggsíðna og á samfélagsmiðlum ýmiss konar. Ég hef lesið bloggið hans og hann bloggið mitt og höfum þannig fengið innsýn í líf hvors annars. Mér finnst ég því hafa þekkt hann, sem ég á vissan hátt gerði.
Það er skrítið, þegar maður fær svona fréttir af félaga sem maður hefur aldrei hitt, hvað það snertir mann, og að uppgötva að maður á sér í raun vini og kunningja víða um veröld, sem skipta mann máli og koma við sögu í daglegu lífi manns.
Mig grunar að einhverjir lesendur þessa bloggs hafi haft svipuð kynni af honum. Mér finnst því við hæfi að minnast hans hér. Á þessum bloggi hefur hann oft skilið eftir fjörug og stundum klikkuð ummæli, nánast frá upphafi. Nú hefur rödd á netinu þagnað, rödd sem ég mun sakna.

Post

2011-07-21T05:19:00.001+02:00

This is a post

Fyrsta dýfan

2011-07-04T11:59:00.000+02:00

Tók hjólið hennar Jóhönnu í gær (bremsurnar á mínu eru bilaðar) og tók stefnuna á Askimbadet. Var ekkert búinn að hreyfa mig frá því daginn áður en Nói fæddist og fannst ég verða að koma blóðinu á hreyfingu og reyna dáldið á hjartað og allt þetta. Svo ég tók smá power-hjólatúr. Askimbadet er í um 8 km fjarlægð frá Godhemsplatsen og ég náði að hjóla þangað á um 20 mínútum, sem verður að teljast býsna gott! Þegar þangað var komið var lítið annað að gera en að henda sér í sjóinn. Það var ferlega gott, þó að vatnið hafi verið í það kaldasta (18 gráður). En fullkomin fyrsta dýfa ársins.

Video-bloggur nr. 8

2011-06-20T11:10:00.000+02:00

MVI 1670

2011-05-28T20:14:00.000+02:00

Laugavegurinn

2011-05-28T15:18:00.002+02:00

Enn einu sinni kemur upp hugmynd um að loka Laugaveginum að hluta fyrir bílaumferð í takmarkaðan tíma. Enn einu sinni setur verslunarfólk í götunni sig upp á móti slíkum hugmyndum. Í þetta sinn er sá hópur reyndar í minnihluta, en merkilega stór engu að síður. Ég skil ekki alveg hugsunina á hjá þeim. Þá þykir mér eitthvað vanta í pælingarnar hjá þeim sem vilja keyra niður götuna.

Nokkrir punktar:

• Hversu líklegt er, þegar ég keyri niður Laugaveg og keyri framhjá, t.d. Tiger, eða Bókabúð Máls og menningar eða Fataverslun Guðjóns, að það detti í mig, heyrðu já, mig vantar ostaskera/bók/nærbol og stökkvi inn í búðina. Það er ólíklegt, nema ég finni bílastæði akkúrat fyrir utan, en á því eru nær engar líkur.

• Hversu líklegt er, þegar ég rölti niður Laugaveg og geng framhjá fyrrgreindum búðum, að ég stökkvi inn í sömu erindagjörðum. Tja, þær eru a.m.k. talsvert meiri en ef ég væri að rúnta á bíl þessar leið.

• Hversu líklegt er, þegar ég keyri niður Laugaveginn, að ég finni laust stæði þar, hvað þá í einhverri umtalsverði nálægð við þá verslun sem ég ætla inn í.

• Hversu oft, þá er ég keyri á bíl niður í bæ, legg ég við sjálfan Laugaveginn en ekki í einhverjum hliðargötum við hann eða bílastæðahúsum. Tja, það er ekki oft.

• Hvaða gagn gerir það raunverlega verslun í götunni að hægt sé að keyra hana í gegn?

• Hversu hentugt er það í raun fyrir þá sem ætla að versla niðrí bæ að geta keyrt niður allan Laugaveginn?

• Á þeim kafla sem lokunin er ráðgerð, frá gatnamótunum við Vitastíg niður að gatnamótunum við Skólavörðustíg eru eingöngu 17 bílastæði við Laugaveg sjálfan. Hvað munar um þau?

Síðustu ár hefur það færst í vöxt að fólk vilji sitja við útiborð þegar veðrið er sæmilegt. Nokkrir veitingastaðir hafa reynt að koma upp einhverri slíkri aðstöðu en það eru yfirleitt nokkur borð alveg við vegginn, oní gangandi umferð við hliðina á bílaumferðinni. Ef bílaumferðin hverfur eykst væntanlega plássið undir þessa aðstöðu. Má ekki telja líklegt að fleiri leggi leið sína upp og niður Laugaveginn og staldri jafnvel við? Verða ekki einhver margfeldisáhrif af þessu? Meira pláss fyrir fólk til að staldra við -> fleira fólk sem staldrar við -> fólk eyðir auknum tíma við götuna = fleira fólk sem stoppar = aukin verslun? Eða er ég alveg að misskilja?

Það eru ekki margir sem lesa þennan blogg og væntanlega allir þeir hlynntir að gera Laugaveginn að göngugötu. Svo ég fæ væntanlega engin svör við þessum spurningum.

Röfl...

Video-bloggur nr. 6

2011-05-16T16:19:00.001+02:00

Video-bloggur nr. 5

2011-04-16T18:22:00.002+02:00

Video-bloggur nr. 4

2011-04-05T23:28:00.001+02:00

Sigurðarmál

2011-04-05T23:20:00.000+02:00

Það er komið að Sigurðarmálum.

Minnugir lesendur bloggsins sjá nú kannski að hin árlega vorumfjöllun er óvenju seint á ferð í ár. Hún hefur yfirleitt komið í miðjum mars en nú er liðið smá á apríl. Ég reit reyndar á Facebook 22. mars: „Fokk! Ég held að vorið hafi verið að detta inn.“ Það varð vissulega breyting á veðrátttunni um það leyti en hún var nú samt óskaplega takmörkuð. Það er kannski hægt að segja að það hafi farið hægt af stað þann daginn. Þetta er samt nokkuð síðar, kannski viku síðar en yfirleitt og umskiptin sumsé hægari. En ég ætla að segja að vorið sé komið hér í Gautaborg. Og þó fyrr hefði verið. En þetta er enn það ómerkilegt að það kallar ekki á vorvísu strax.

og enn einn póstur

2011-04-01T10:39:00.001+02:00

Hjörtur Scheving leitar sér að íbúð og sendir fyrirspurn við auglýsingu á netinu. Hann sendir sjálfum sér afrit (öll heldur mér):

Vi har lyst til å se nærmere på denne boligen, er det mulighet å komme på visning?
Hilsen
Hjörtur Scheving

Hann fær svar um hæl:

Hei.

Det skal vi få til.
Kan du sende over litt info om deg/dere som er interessert?
Når kan du evt flytte inn om den skulle passe?
Passer det med visning på dagtid?

--
Med vennlig hilsen
Utleiemegleren Homansbyen

Video-bloggur nr. 3

2011-03-25T13:54:00.000+01:00

Video-bloggur nr. 2

2011-03-18T12:20:00.000+01:00

Video-bloggur nr. 1

2011-03-16T14:33:00.001+01:00

Og enn af pósti

2011-03-14T14:03:00.003+01:00

(#twitter) Ekki hætta dularfullar póstsendingar á netfangið mitt. Nú um daginn, 8. mars barst mér eftirfarandi:

Sæll Hjörtur

Við erum lítill hópur sem hyggst byggja og reka lítið einkasjúkrahús hér í Reykjavík. Undirbúningsvinnan er komin á fulla ferð.
XXXX gaf mér netfangið þitt, við töluðum saman um helgina.
Eingöngu verður um liðskiptaaðgerðir (hné- og mjaðmir) að ræða.

Við erum að líta í kringum okkur eftir góðum bæklunarlæknum sem gætu hugsað sér að flytja heim og taka þátt í framtíðaruppbyggingunni með okkur.

Hafi þetta vakið áhuga þinn vinsamlega sendu mér e-mail með símanúmerinu þínu og hvenær hentar að ég hringi í þig. Ég hef svo samband við þig í framhaldinu.

Leiðinlegt að missa af þessu tækifæri. En ég treysti mér bara ekki í liðskiptiaðgerðir eins og er.

Svo í dag kom þetta frá einhverri stúlku:

Sæll Hjörtur,

Ég kom með nótur fyrir tveimur takkaskópörum fyrir svona 3-4 vikum og ég hef ekki ennþá fengið þetta greitt inná reikninginn minn?

Tekur þetta langan tíma?

Ég veit ekki hvaða takkaskó þessi stúlka er að tala um.

Af fréttum

2011-02-24T13:47:00.005+01:00

Ég get ekki orða bundist. Þó svo að fréttin komi lesendum á Íslandi lítið við og er ekki stórmál í sjálfu sér, er þetta einkenni á arfaslakri fréttamennsku á þessum vefmiðlum á Íslandi.

Hér er fréttin. En ég afrita texta hennar hér, ef hún skyldi verða uppfærð einhvern daginn.

Bankamaðurinn Ross McBride notaði afsláttarkort til að hlúa að bólgnum kynfærum sonar síns eftir að hafa sparkað bolta í hann.

Í febrúar 2008 var hinn 23 ára gamli McBride svekktur yfir að hafa ekki fengið Valentínusarkort frá kærustunni sinni. Í bræði sinni sparkaði hann eins fast og hann gat í fótbolta sem lenti milli fótanna á barninu.

Eftir nokkurn tíma tók McBride eftir að kynfæri barnsins höfðu bólgnað upp. Þá tók hann afsláttarkortið sitt úr veskinu, braut það og reyndi að ýta á bólguna. Þegar ekkert gekk reyndi hann loks að nota horn kortsins til að stinga á bólgurnar.

Drengurinn var færður á sjúkrahús með mar, bólgur og nokkur sár eftir björgunaraðgerðir McBride. Hann hefur náð sér að fullu.

McBride var ákærður fyrir athæfi sitt en saksóknari í Glasgow tók sérstaklega fram að málið væri alls ekki kynferðisafbrotamál.

Við lesturinn fannst mér eitt og annað undarlegt í fréttinni. Ég hugsaði sem svo: Það hlýtur eitthvað að vera að þessum manni. Svo ég sló nafni mannsins upp á Google News. Ég fann fjórar frásagnir af þessu og viti menn, þar kom eitt og annað fram sem vantaði í íslensku þýðinguna. Þýðingin er væntanlega unnin úr þessari frétt.

Í fyrsta lagi kemur þar fram að umræddur maður er alls ekki bankamaður, heldur frá Clydebank í Skotlandi! Annað er líka stórmerkilegt að aðeins einni málsgrein er sleppt í þýðingunni. Hins vegar er óskiljanlegt afhverju einmitt þeirri málsgrein er sleppt: "Mcbride, who suffers from autism, admitted using culpable and reckless conduct."

Þetta gefur málinu að mínu mati ákveðna skýringu. Stórfurðuleg hegðun bankamannsins frá Skotlandi er hér skýrð með einu orði: Autism, einhverfa.

Kannski er enska fréttin sem þýtt er úr heldur ekki nógu nákvæm. Ef aðrar fréttir af málinu eru lesnar kemur eftirfarandi fram: "The court was told that McBride, who admitted culpable and reckless conduct at an earlier hearing, suffers from autism, emotional difficulties and low intelligence." En að maðurinn sé með einhverfu á nú að vera nóg til að álykta: Já ókei. Ég skil.

Maður spyr sig: Hversu miklu er eiginleg sleppt í fréttum sem eru þýddar í íslenskum fjölmiðlum?

Eina ósk

2011-02-23T11:06:00.003+01:00

(#twitter) Eftir að ég flutti til Svíþjóðar pirraði það mig í fyrstu hversu allt þarf að ræðast hér. Það er aldrei hægt bara að kýla á eitthvað öðruvís en að ræða það í þaula fyrst. Íslendingurinn ég leit auðvitað á þetta sem ferlegan ókost. Óþarfa röfl sem gerði ekkert annað en að tefja málin. Stundum finnst manni að Svíar reyni að gera vandamál úr öllu. Allt þarf að skilgreina og öllu þarf að gefa nafn.

Öðruvísi mér áður brá. Ég sé nú kostina við þetta. Svíar ræða nefnilega kjarna málsins og nálgast hann frá sem flestum hliðum. Svarið þarf nefnilega ekki bara að vera já/nei, jú/víst, svart/hvítt. Það eru nokkrar hliðar á öllum málum og upplýst ákvörðun byggist á því að þær hafi allar verið skoðaðar. Auðvitað getur þetta gengið út í öfgar og málin rædd endalaust án þess að nokkur botn fáist í þau. En yfirleitt næst niðurstaða, einhver concensus. Eftir að hafa búið hér í Svíþjóð síðustu fjögur árin vildi ég óska að umræðuhefðin á Íslandi væri eitthvað í líkingu við þá hér en ekki bara hin svarhvíta jú/nei/víst/fífl-umræða.

Reyndar eru málefnin oft þaulrædd á Íslandi. En yfirleitt á nákvæmlega sama hátt, hvert sem málefnið er. Það er sama hvað er rætt, A, B, C eða D. Umræðan er alltaf E:

A. Eigum við að samþykkja eða hafna Icesave-samningum?
B. Hvers vegna eigum við/eigum við ekki að ganga í ESB?
C. Hvernig eigum við að leysa stjórnlagaþingsmálið?
D. Eigum við að virkja eða ekki?

E. Forsetinn er fífl, ríkisstjórnin er fífl, samfylkingin/sjálfstæðisflokkurinn/VG/framsókn er fífl, blaðamenn eru fífl og á mála hjá hagsmunaaðilum, það er engin alvöru blaðamennska til á íslandi, þú ert kommúnísti, þú ert femínisti, þú studdir útrásina, jú, nei, víst, fífl....

Þegar boðið er upp á rökræður um málefnin eru yfirleitt farin sama leiðin, t.d. í þáttum á borð við Kastljósið: Málefnið skal ræða og fenginn einn fulltrúi sem er sannfærður á móti og annar samfærður með. Þannig er umræða pólaríseruð og raun og veru ekki boðið upp á annað en: já/nei/jú/víst/fífl-umræðuna. Niðurstaðan sem áhorfendur fá er sú að það er hægt að vera með og á móti málinu, en yfirleitt hefur fólk ekki hugmynd um hvers vegna. Það er þessi MORFÍS-hugsunarháttur. Þú talar gegn málinu til að tala gegn því, ekki til að upplýsa um ókosti þess. Þetta sést svo kristaltært á Alþingi. Stór hluti þingmanna sjálfstæðisflokksins talar gegn ESB og Icesave-samningum þrátt fyrir að vera hlynntur þeim. Vinstri-Grænir tala með áætlun Alþjóðagjaldeyrissjóðsins, Icesave-samningum og Umsóknarferlinu fyrir ESB þrátt fyrir að vera gjörsamlega andvígir þeim. Samfylkingin talar gegn þjóðaratkvæðagreiðslum sem þeir hafa þrástagast á til þessa. Það er helst framsóknarflokkurinn er sem trúr sinni skoðun, hver sem hún reyndar er!

Það þarf að ræða málefnin sjálf, vega og meta, ræða ókostina og kostina. Auðvitað má maður vera með og á móti, en maður þarf að gera sér og öðrum grein fyrir hvers vegna. Og manni má snúast hugur. Annars er enginn tilgangur að ræða málin.
Þetta er svona það sem ég óska mér. Hvað er hægt að gera til að gera þá ósk að veruleika?

Sunny day

2011-02-21T18:15:00.003+01:00

Af kvikmyndum: Le hérisson

2011-02-17T12:07:00.007+01:00

Fórum í Hagabíó í gærkvöldi. Þangað förum við allt of sjaldan. Þar er hægt að setjast niður og njóta góðra veitinga áður en maður kíkir á myndir sem ekki rata í kómersjal kvikmyndahúsin. Sem minnir mig á það: Eru ekki allir duglegir við að kíkja í Bíó Paradís reglulega?

En í gær fórum við sum sé að sjá frönsku kvikmyndina Le hérisson (Broddgölturinn). Ég vissi nákvæmlega ekkert um myndina áður en við sáum hana, fyrir utan að hún væri byggð á skáldsögunni L'élégance du hérisson sem var metsölubók hér í Svíþjóð í fyrra, Igelkottens elegans í sænskri þýðingu, og jú að hún hefði fengið 100% í einkunn á rottentomatoes.com.
Og nema hvað, Broddgölturinn er glæsileg kvikmynd, angurvær, blíð, falleg með settlegum húmor, uppfull af mikilfenglegum smáatriðum sem hverfast saman í ákveðið súbstans af algjöru áreynsluleysi (alltaf gaman að bulla útúr sér bókmenntafræði). Eins og japönsk matargerð, sem kemur jú talsvert fyrir í myndinni.

Myndin er fyrsta kvikmynd leikstjórans, Mona Achache, í fullri lengd. En ég ætla að fylgjast með henni í framtíðinni.

Annars var skondið að í bíósalnum í gær vorum við Jóhanna og svo um 30 konur um sextugt. Myndin á nú samt að höfða til allra aldurshópa og allra kynja, ef því er að skipta.

Af Google

2011-02-16T16:50:00.005+01:00

(#twitter) Mér finnst Google alveg ágætt. Ég er mestmegnis gúglaður.

Í nokkurn tíma hefi ég vitað hvernig leita skal eftir síðum undir tilteknu landsléni, nú eða finna út hvað eitt gallon eru margir lítrar, eða reikna út flókin dæmi eða finna skilgreiningar á hinu og þessu eða fletta upp sýningartímum í bíó.

Nýlega uppgötvaði ég nokkrar leitaraðgerðir á Google:

T.d. að tékka á stöðunni á tilteknu flugi, sjá hvenær sólin kemur upp á einhverjum stað eða hvað klukkan er í fjarlægri borg.

Allt þetta með einni leit og niðurstaðan birtist efst án þess að maður þurfi að smella sig neitt áfram.

Svona finnst mér skemmtilegt.

Enn af pósti

2011-02-16T10:05:00.003+01:00

Í dag fékk ég enn einn dularfulla tölvupóstinn:

Mundu að skrá þetta allt niður í símann þinn og vertu með inneign á honum á leiðinni og hafðu hann full hlaðinn, skráðu í símann allar upplýsingar varðandi flugið, vegabréfsnúmerið þitt og veru með einvherja dollara með þér þannig að þú getur hringt úr tíkallasíma ef á þarf að halda.

Það sem ruglaði mig fyrst í ríminu var að undir þetta ritar svo einhver Mummi. Minn elsti vinur heitir Mummi og hann á það til að gefa góð ráð. Við nánari skoðun mátti sjá að þetta var ekki minn Mummi.

Abby

2011-02-11T16:10:00.002+01:00

Stundum kemur til okkar í heimsókn kisan af neðri hæðinni. Við köllum hana Abby, afhverju veit ég ekki. Þetta er korkaður köttur sem þykir held ég miklu skemmtilegra hjá okkur en heima hjá sér. Hún er líka stundum lokuð úti frammi á gangi. Þá bjóðum við henni í heimsókn.

Af skokki

2011-02-09T10:36:00.003+01:00

(#twitter) Ég las í gær á einhverjum vefmiðlinum frétt þar sem sagt var frá skokkara sem lamdi tólf ára dreng. Það sem mér þótti þó merkilegast í fréttinni að náunginn lamdi drenginn af því að hann var að elta hann og hía á hann. Svona er þetta á íslandi. Skokkarar eru svo sjaldséðir að það er beinlínis híað á þá þegar þeir sjást úti á götu.

Undarlegt land.

Að fæða geit

2011-02-08T23:12:00.002+01:00

Um daginn vaknaði ég eftir furðulegustu draumfarir. Mig dreymdi að ég væri staddur á hanboltaleik, í kvennaboltanum, og ein af leikkonunum var há svört kona með sítt hátt og langar lakkaðar neglur. Svo skyndilega hné konan niður og byrjar að fæða. En hún fæðir ekki barn heldur geit, og varla neinn kiðling heldur fullvaxna geit. Ég var á þessum handboltaleik með nokkrum vinum og verð alveg forviða. Eftir leikinn liggur leiðinn svo í búðaráp, en ég er mjög upptekinn af atburðinum og vil ræða þetta ítarlega og spyr vinkonu mína, sem hefur reyndar meiri áhuga að versla, í sífellu hvernig það megi vera að manneskja og geit geti eðlað sig. Það nái engri átt og undir hvaða kringumstæðum verður slíkt. Ég fer að leiða hugann að því hvort konan hafi leikið í dýraklámi eða að hafur hafi nauðgað henni. Því mér dettur ekki í hug að kona hafi mök við hafur af fúsum og frjálsum vilja eða af frygð.

Nú er spurninginn: Hvernig má ráða í þetta?

Hinn Hjörtur?

2011-02-06T12:51:00.009+01:00

Einn er fastur liður hjá mér, nánast í hverri viku. Ég fæ sendan póst sem ekki er ætlaður mér, heldur einhverjum öðrum Hirti. Svona er þetta búið að vera í circa þrjú ár. Í fyrstu hélt ég að um einhvern einn Hjört væri að ræða sem hefði fyrir mistök gefið upp mitt netfang í sífellu. Eftir að hafa rakið mig í gengnum efni þessara tölvupósta sýnist mér hins vegar að um nokkra Hirti hljóti að vera að ræða. Ég ákvað að kanna málið betur.

Fyrstu póstarnir sem bárust mér fjölluðu mikið um golf. Einhverjir gaurar að skipuleggja golfferðir saman og álíka. Svo fóru að berast mér málefni einhvers golfklúbbs og svo loksins ítarlegur póstur um málefni Úthlíðarklúbbsins, sem svo er kallaður. Það þurfti ekki mikla rannsóknarvinnu til að komast að því að þessi póstur átti að fara á Hjört Vigfússon, formanns áðurnefnds klúbbs.

Nú, svo fékk ég áætlun frá einhverri Þóru Fríðu um einhverja námshelgi á Stokkalæk. Í póstinum kom eftirfarandi fram: „Stokkalækur er tónlistarsetur sem þau reka hjónin Inga Ásta Hafstein og Pétur Hafstein.“ Eftir smá gúggl komst ég að því að þarna hafi pósturinn líkega verið ætlaður Hirti Yngva Jóhanssyni, væntanleg þeim sem er píanóleikari í Hjaltalín. Námshelgin hefur væntanlega verið sú sem getið er hér. Þetta virðist hafa verið bráðskemmtilegt og Hjörtur skilaði sé í ferðina þrátt fyrir að hafa ekki fengið póstinn.

Svo voru það leiðismálin. Margir póstar sem fjalla um legstein sem, að því er virðist, börn Gísla Andréssonar frá Hálsi í Kjós og Ingibjargar Jónsdóttur frá Gemlufalli í Dýrafirði voru að panta. Mér sýnist að þann póst hafi hann nafni minn Gíslason átt að fá. Þetta var fallegur skjöldur sem þau voru búin að velja á leiðið. Stuttu eftir leiðismálið sendi Sigríður Kristín Gísladóttir, sem er væntanlega systir Hjartar, netföng allra systkinanna, þau virðast vera átta í allt (Guðmundur, Jón, Halldór, Ágústa, Sigríður Kristín, Gísli Örn, Andrés Freyr og Hjörtur). Stór systkynahópur. En ég lét Sigríði Kristínu vita af því að netfangalistinn hafi farið í rangar hendur, sem sagt mínar. Engu að síður fæ ég nokkrum mánuðum síðar póst frá Jóni Gíslasyni um dómsmál sem þau systkinin höfðu átt í. Nú ég var auðvitað orðinn forvitinn um þessa fjölskyldu sem mér fannst ég líka farinn að þekkja ágætlega svo ég fletti upp og las um dómsmálið. Því lauk nú ekki vel fyrir þau. Ég vona að rangar tölvupóstsendingar hafi ekki haft áhrif á dómsniðurstöðu!

Jæja, þá er það Hjörtur Hjartarson, nemandi við FB, fæddur 1981. Hann var að biðja um yfirlit yfir þau fög sem hann hafði lokið við FB. Sem betur fer, fyrir okkur báða, eru upplýsingar um slíkt víst ekki sendar með tölvupósti, en hann fær þó að vita hversu mörgum einingum hann hafi lokið... þær voru fjölmargar og Hjörtur greinilega duglegur strákur (en auðvitað veit ég ekki hvaða einkunnir hann hefur fengið). Ekki fékk ég fleiri pósta um þetta mál. En að sjálfsögðu var forvitni mín vakinn um nafna minn Hjartarson. Hvaða gaur var þetta? Kom í ljós að um er að ræða Hjört I. Hjartarson sem starfar á skrifstofunni hjá ÁTVR og virðist líka halda úti þessari vefsíðu.

Jæja, þá eru það málefni rótarýklúbbsins. Hinn þriðja ágúst í fyrra sendir Ólafur Egilsson póst á einhverja Margréti Friðriksdóttur um einhverja heimsókn hinn 3. september. Já! Afmælisdaginn minn, þetta hlaut þá að koma mér við. En nei, um var að ræða heimsókn umdæmisstjóra Rótarý 2010-2011 til Rótarýklúbbs Seltjarnarness. Það var þá ekki flókið mál að fletta því upp að sá póstur átti að fara á Hjört Grétarsson, upplýsingatæknistjóra. Ekki fann ég mikið um hann með gúggli, en sýnist hann starfa á Upplýsingatæknimiðstöð Reykjavíkurborgar, fyrir nú utan að hann er í rótarýklúbbi á Seltjarnarnesi.

Seinna í ágúst bað Agnes Johansen, framleiðandi hjá Blueeyes, einhvern Hjört um „Daily Reports“ fyrir fimmtudag og föstudag. Ég veit ekki meira um það mál eða um hvaða Hjört er að ræða.

Nú um daginn barst svo erindi á sænsku frá Ninu Åkerberg hjá Transportstyrelsen í Örebro um ökuskírteinið mitt. Eða svo hélt ég í fyrstu, því eðlilega tók ég þetta fyrst til mín. Fór að hafa áhyggjur um að ég hefði týnt ökuskírteininu mínu eða álíka. Þegar ég fór að rýna í póstinn sá ég þó að þetta hlyti að hafa átt að fara á einhvern enn einn Hjörtinn. Google segir mér að það sé einhver Hjörtur Oddsson læknir í Örebro. Gæti verið hann. Kannski, kannski ekki.

Skömmu fyrir áramót barst mér tilkynning frá Velje BK í Danmörku um að einhver Haukur Páll væri velkominn til reynsluæfingar hjá liðinu í vikutíma í janúar. Ég er ekki alveg 100% viss hvaða Hjörtur átti að fá þann póst, en mér dettur helst í hug Hjörtur Freyr Vigfússon, framkvæmdastjóri Vals, en einhvern Hauk Pál, fyrrum Þróttara, má finna í herbúðum Vals. Mér sýnist líka að umræddur Haukur Páll hafi komist á æfingar hjá danska liðinu þrátt fyrir að boðskortið hafi lent hjá mér. Það var nú gott.

Sigþór, einhver pípulagnameistar, sendi mér fyrir stuttu þjónustusamning um vatnsúðakerfi. Ég svaraði honum og afþakkaði pent. Enda hef ég lítið við slíkt að gera, en benti honum á að tala við einhvern nafna minn.

Þá var mér send, á spænsku, ítarleg ferðaáætlun fyrir einhvern Hjört Jónsson til Santiago. Nokkrir kostir voru í boði, m.a. í gegnum París og Madríd. Þetta virðist spennandi ferð og ég óska nafna mínum góðrar ferðar (Hann átti að leggja af stað nú rétt fyrir helgi og ekki snúa aftur fyrr en 21. mars! Vona að hann hafi fengið flugmiðann og sé kominn á áfangastað).

Svo í dag er ég búinn að fá sent nokkrum sinnum lykilorð á áskriftarvef 365 miðla. Væntanlega einhver Hjörtur sem hefur gefið upp rangt netfang í upplýsingunum þar. Virðst hafa gleymt lykilorðinu og búinn að þrábiðja um nýtt. Vonandi hefur hann bara hringt í þá út af þessu. En nafni, ef þú ert að lesa þá er lykilorðið in3JHtz9.

Þetta er svona dæmi um það sem mér hefur borist bara síðasta árið. Þetta er mun meira og margt torlæst og dularfullt. Ég var satt að segja orðinn þreyttur og pirraður á öllum þessum röngu póstsendingum, þar til ég fór að skoða þetta betur og reyna að grafa þessa Hirti upp. Ég auðvitað svara öllum og reyni að leiðrétta mistökin, segi að pósturinn hafi sennilega ekki átt að fara til mín. En allt kemur fyrir ekki. Ég fæ þá bara póst til einhvers enn annars Hjartar í staðinn.

Hvað fæ ég næst? Aldrei að vita. En ég pósta því auðvita öllu hér á blogginn um leið!

Hráskinnaleikur?

2011-02-04T10:03:00.005+01:00

(#twitter) Á undanförnum dögum hef ég heyrt marga segja eitthvað misgáfað um tónlistarmenntun og tónlistarlíf í landinu. Nokkrir aular voru eitthvað að skammast út í styrki til tónlistarmála og sögðu sem svo: Bíddu, er ekki tónlist að skila svo rosalegum tekjum? Hvers vegna þarf hún þá að vera á styrkjum?

Hálfvitar.

Annars hef ég verið að velta fyrir mér orðinu „hráskinnaleikur“.
Eftir því sem ég best veit er hráskinnaleikur upphaflega leikur þar sem nokkrir stilla sér í hring, umhverfis einn í miðjunni og kasta svo á milli sín bolta sem sá í miðjunni á að reyna að ná með einum eða öðrum hætti.

Hráskinnaleikur hefur oft verið notað sem líking um starfsaðferðir í stjórnmálum, enda ekki skrítið. Pólitískur hráskinnaleikur myndi þá væntanlega vísa til þess að einstaklingur eða flokkur reyni hvað sem er til að ná völdum eða áhrifum og beitir til þess ýmsum brögðum.

Hins vegar hefur mér heyrst fólk nota þetta hreinlega bara yfir allt sem stjórnmálamenn gera. Ef stjórnmálamaður gerir eitthvað er það bara kallað hráskinnaleikur. Það má vel vera að eitthvað sé til í því. Kannski er pólitíkin bara eintómur hráskinnaleikur. En svo má líka vera að fólk einfaldlega þekki ekki alveg merkingu orðsins.

Klækjabrögð, prettir, lygar og pólitískt ofbeldi, getur í mínum huga allt verið dæmi um hráskinnaleik í stjórnmálum.

Margir nota orðið hins vegar um hluti sem ég myndi frekar kalla þvaður, röfl, deilur um keisarans skegg, málþóf, leikræna tilburði, tímasóun, rifrildi o.s.frv.

Kaupæðisleg

2011-01-31T21:37:00.008+01:00

(#twitter)Við fórum í göngutúr í gær ásamt Tomas, Linu og Fabian. Hoppuðum í älvsnabben og ætluðum að taka smá rölt á Hisingen. Í bátnum fundum við auglýsingu fyrir myndavél sem við erum búin að tala um lengi að kaupa okkur. Svo við tókum bátinn bara alla leið að Nordstan og fjárfestum í einni. Réttlætingin var auðvitað sú að þarf að vera til almennileg myndavél á heimilinu til að dokúmentera fyrstu ár barnsins. Svo er hægt að taka í þessu HD-vídeó til að senda ömmunum á Íslandi fyrstu mánuðina. Það er nauðsyn!

Annars erum við líka búin að vísítera kvikmyndahátíðina síðustu daga. Sáum í kvöld Exit through the gift shop, sem er þrælskemmtileg. Brim í gær, sem er bráðgóð og 127 tímar í fyrradag, sem var fulllöng en þokkaleg. Kannski kvikmyndablogga ég um þessar ræmur einn daginn. Kannski, kannski ekki.

Gotland

2011-01-29T18:46:00.006+01:00

(#twitter) Jú, við erum búin að ákveða að halda sumarfrí Gotlandi í sumar. Búin að tala um þetta lengi og látum nú verða af. Tomas, Lina og Fabian koma og vonandi Finnur, Gulla og Saga. Húsið hefur verið bókað og ég búinn að gúggla öllu upp á Google Maps eins og lög gera ráð fyrir. Þetta lítur bara vel út. Það er undarleg tilfinning að skipuleggja ferðalag með ófæddu barni. Maður veit ekkert um hvernig er að ferðast með ungabarn, en reynir að skipuleggja allt út frá því. Reyndar er skipulagið ekki mikið öðruvísi en oft áður. En maður er svona aðeins að hugsa um hversu langt er í helstu nauðsynjar og neyðarþjónustu, svo uppá öryggið. Svo er ráðgert að tveggja og þriggja ára verði með í för og maður er svona að skoða hvort ekki sé hægt að skoða dýr í nágrenninu og hversu barnvænar strandirnar í nágrenninu eru.

Jú, get ekki annað sagt en að þetta sé allt spennandi.

Hér er húsið sem við gistum í. Ekki þessi vanalegi rússrauði tékofi eins og allsstaðar er heldur kalkað steinhús, sem er víst dáldið Gotlands-style:

IAT

2010-11-18T18:05:00.001+01:00

Tók svona IAT-próf. Þetta var niðurstaðan:

MALE-FEMALE:
Your data shows a slight association between SELF and FEMALE

EXTROVERTED-INTROVERTED:
Your data suggest no difference in your associations between SELF and INTROVERTED or EXTROVERTED

WARM-COLD:
Your data shows a slight association between SELF and COLD

DEPENDABLE-CARELESS:
Your data shows a slight association between SELF and
DEPENDABLE

CALM-ANXIOUS:
Your data shows a slight association between SELF and CALM

CREATIVE-CONVENTIONAL:
Your data shows a strong association between SELF and CREATIVE

Ætli þetta sé bara ekki nokkuð on the money?

Jason Bourne I

2010-11-05T15:19:00.004+01:00

(#twitter) Þegar ég var í media náminu í Amsterdam spurði bekkjarfélagi minn einn föstudag hvað ég ætlaði mér að gera um helgina. Eg svaraði að planið væri að horfa á myndirnar Bourne Identity og Supremacy. "Interesting!" sagði hann og fór að velta þessu fyrir sér, stuttu seinna kom í ljós að honum heyrðist ég segja að ég ætlaði að skrifa ritgerð um Porn, Identity og Supremacy, sem vissulega hljómar interesant!

Vetur

2010-11-03T13:21:00.003+01:00

(#twitter) Hann er þá kominn og af því tilefni spila ég Journey.

Haldið til haga

2010-10-29T15:37:00.004+02:00

(#twitter) Eg held senn til heimahaganna. Seinast þegar ég tilkynnti á Facebook að ég skyldi halda til heimahaganna límdi Guðlaugur Jón á færsluna kvæði:

ó, fjársnauði, aldraði vinur, hve fúl er vor glíma!
Hví fjötrar oss skyldan? Hví nagar oss lífsleiðinn grái?
Læstir á skrifstofum, límdir við flöktandi skjái
við leitum í ylinn frá minningum liðinna tíma.

Er við vorum ungir og ókunnir hversdagsins puði
almúgafólksins er lífsgæðahildina háði,
er lífið úr lukkunnar staukum á veg okkar stráði
og ljómandi fríðir við blótuðum æskunnar guði.

Um vetursins frosthörkur vináttan leið okkar lýsti
uns vorsólin litfögur iljaði sálunum ungu
og lóurnar, léttar í spori, af túnblettum sungu
lofsöngva, okkur til dýrðar, með kátlegu tísti.

Þeir mildustu dagar enn merla í draumsýnum mínum
er mæta við örkuðum sólbjarta æskunnar vegi
og vormild hún vermir mér, nú þegar kular af degi
vonin um eilífa hlýju í örmunum þínum.

Nú skal haldið heim á ný og af því tilefni svaraði ég Guðlaugi á vegginn hans í dag:

ó, vinur! Hve hefur oss veröldin alið með blíðu
og vinskapinn okkar ræktað með ástríki í hjarta,
framgangi sáldrað um framabraut lífsgeislans bjarta
og fróðleik sem lýsir oss veg gegnum hversdagsins stríðu.

Víst gaf oss tilveran ungdómsins ómældu þýðu.
Um ástleysi, víl eða hörku ei þurftum að kvarta.
En mundu að minningum einum ei dugir að skarta
um munúð og hamingju æskunnar, sveindómsins fríðu.

Er hún þér glötuð, frygðin sem bar oss á brjósti?
Bölvar þér lífið og svarar þér aðeins með þjósti?
Vermir ei kætin þér nú þegar kular af degi?

Því gleðin hún lýsir víst enn í lífinu okkar
sem lífgandi andblær um ókominn tíma hún skokkar
og veita mun huggun á ellinnar holótta vegi.

Svo mörg voru þau orð og verðugt að halda þeim til haga.

Umburðarlyndið

2010-10-24T13:39:00.007+02:00

(#twitter) Ég er löngu hættur að skammast mín fyrir skrifleysi hér. Enda er ég svo sem ekki að skrifa hér á blogginn fyrir lesendur aðra en mig. Grunar að hér sé enginn lesandinn (nema Siggi).

Ojæja. Ég ætla, og eiga það á hættu að fara að hljóma eins og Eiður Guðnason, enn einu sinni að röfla um mál og málfar og málnotkun.

Umburðarlyndi. Ég kannski legg annan skilning í orðið en margir. En í mínum huga merkir t.d. sögnin umbera að þola eða sætta sig við athafnir eða skoðanir annarra, þó manni sé það jafnvel þvert um geð. Þannig get ég umborið skoðanir harðra frjálshyggjumanna, þó þær séu oft á skjön við mínar eigin og ég sýni partýglöðu fólki í húsinu mínu ákveðið umburðarlyndi, þó það haldi stundum vöku fyrir mér með gleðilátum.

Þess vegna þykir mér nokkuð undarlegt þegar Íslendingar tala á jákvæðan hátt um að á Íslandi ríki mikið umburðarlyndi gagnvart samkynheigðum og að það sýni hversu víðsýn, frjálslynd og nútímaleg við séum.

Það er nú mín ósk að sem fæstir Íslendingar þurfi að umbera samkynhneigða samborgara sína.

Meirihluti?

2010-05-31T15:23:00.002+02:00

(#twitter) Fyrir um tveimur árum var ég með þessar pælingar. Upp spunnust frekari vangaveltur í ummælum. Spurning hvort stemmingin hafi breyst núna.

Auðir seðlar

2010-05-31T10:52:00.003+02:00

(#twitter) Væri ekki hægt að haga því þannig að auðir seðlar hefðu sama vægi og önnur atkvæði? Þannig væri auðir stólar í borgar- og bæjastjórnum í samræmi við hlutfall auðra seðla. Það þætti mér dáldið kúl.

Kosningar

2010-05-26T10:39:00.004+02:00

(#twitter) Þetta fylgi Besta flokksins er magnað. Spurning hvort það haldi sér fram á kjördag. Gæti verið jafnvel að það fari vaxandi á næstu dögum. Hins vegar þykir mér ekkert ólíklegt að raunverulegt fylgi flokksins verði nokkuð minna í kosningunum. Að fólk sem segist ætla að kjósa Besta flokkinn í könnunum hætti við í kjörklefanum og annað hvort kjósi það sem það kaus síðast eða skili auðu. Að mörgum þyki nóg „refsing fyrir flokkakerfið“ að hóta að kjósa Besta flokkinn. (#twitter)

Dýrafjörður

2010-05-18T15:29:00.004+02:00

Ég heyrði Sölva Tryggvason taka sér í munn máltækið „Nú falla öll vötn til Dýrafjarðar“ um daginn. Hann fór rétt með upprunann þegar hann vísar í sögu Gísla Súrssonar. Hins vegar fór hann rangt með máltækið sjálft. Hann notaði það í sömu merkingunni og að öll spjót bærust nú að Lúxemborg. Að öll vötn falli til Dýrafjarðar vísar til þess að ekki verði aftur snúið.

Í þessu samhengi má líka nefna að enska máltækið „All roads lead to Rome“ merkir allt annað en hið svipaða íslenska. Þar er átt við að margar leiðir séu að sama markmiðinu.

(#twitter)

Besti flokkurinn

2010-05-18T11:27:00.004+02:00

Leiðindaröflfærsla: Hef blendnar tilfinningar til þessa Besta flokks. Jújú, ágæt leið til að benda á skrípaleikinn sem pólítíkin er. En hversu langt á grínið að ná? Segjum að þau nái inn þessum sex frambjóðendum sem kannanir spá nú. Ætla þau þá að halda gríninu áfram og fá borgað fyrir það? Sinna öllum skyldum borgarfulltrúa í einhveru gríni? Varla, enda kom það fram í upphafi að þau ætli ekki að standa við nein af stefnumálunum. Ætli sé ekki frekar hætta á að grínið koðni niður og að þau átti sig á að starf borgarfulltrúa geti verið grautfúlt með fullt af ábyrgð og ákvörðunum sem þarf að taka sem snerta þúsundir manna en hvert á sinn hátt þannig að fólk er aldrei ánægt með neitt sem maður gerir. Ekki það að ég treysti ekki þessu fólki til ágætis verka, aðallega spurning á hvaða forsenum það er. (#twitter)

Grín?

2010-05-17T15:16:00.001+02:00

Stundum veit maður ekki hvort er meira grín:

Undarlegt lið II

2010-05-09T17:22:00.002+02:00

Enn skil ég ekki þessar deilur um fyrirhugaða breytingu á stjórnarráðinu og ráðuneytum. Í stjórnarsáttmálanum er skýrum orðum rætt um þessar breytingar. Þetta á varla að koma nokkrum á óvart og varla tilefni til deilna. Eller hur? (#twitter)

Samfélagið í nærmynd

2010-04-29T13:22:00.003+02:00

Ég hef svo sem nefnt það áður hversu mér þykir Samfélagið í nærmynd góður útvarpsþáttur. Þar er vakin athygli á fjölda málefna sem bætt gætu íslenskt samfélag. En eitt liður í þessum þáttum er gjörsamlega óþolandi. Það er þessi gaur sem býr í Noregi og þau hringja stundum í. Hvílík hörmungarleiðindi.

Altered States

2010-04-23T16:27:00.003+02:00

Fláráður kom með þetta. Þetta var kannski aðeins of skarplega veitt hjá mér í lokin miðað við hversu fyrri vísbendingar gáfu litla hjálp.

Altered States var þetta. Frá árinu 1980 eins og þriðja vísbending benti á. Leikkonan sem um var rætt er að sjálfsögðu Drew Barrymore sem varð fræg í myndinni E.T. frá 1982. William Hurt var leikarinn sem lék geðsjúka vísindamanninn.

Föstudagsgetraun, frh.

2010-04-23T15:11:00.005+02:00

Hvaða hvaða hvaða! Það er kominn enn á ný föstudagur. Hvað varð um þessa viku. Og ekkert svar borist við getraun síðustu viku? Þetta er alls ekki nógu gott. Höldum áfram og vonumst eftir svari fyrir næsta föstudag (#twitter):

Spurt er um kvikmynd:

1. vísbending: Myndin markar engin þáttaskil í kvikmyndagerð og er ekki hátt skrifuð í kvikmyndasögunni. Hún markar þó upphaf kvikmyndaferils tveggja þekktra Hollywood-leikara, karls og konu.

2. vísbending: Þáttur umræddrar leikkonu var ekki mikill í myndinni og henni skaut ekki upp á stjörnuhimininn fyrr en í næstu mynd sem hún lék í tveimur árum síðar.

3. vísbending: Myndina má flokka sem vísindatrylli. Fólk greinir á um hvort myndin sé frá lokum áttunda áratugs síðustu aldar eða byrjun þess níunda og var mikið rætt um það fyrir um 10 árum. Sú umræða hafði þó ekkert með þessa mynd að gera.

4. vísbending: Leikarinn umræddi leikur vísindamann sem gerir tilraunir á sjálfum sér sem breyta andlegu ástandi hans. Þessar tilraunir fara svo smátt og smátt úr böndunum. Segja má að í þessari vísbendingu felist aukavísbending.

Föstudagsgetraun 3

2010-04-19T14:26:00.002+02:00

Það er nú kominn mánudagur, en látum oss halda áfram fyrst enginn hefur giskað. Svei mér:

Spurt er um kvikmynd:

1. vísbending: Myndin markar engin þáttaskil í kvikmyndagerð og er ekki hátt skrifuð í kvikmyndasögunni. Hún markar þó upphaf kvikmyndaferils tveggja þekktra Hollywood-leikara, karls og konu.

2. vísbending: Þáttur umræddrar leikkonu var ekki mikill í myndinni og henni skaut ekki upp á stjörnuhimininn fyrr en í næstu mynd sem hún lék í tveimur árum síðar.

3. vísbending: Myndina má flokka sem vísindatrylli. Fólk greinir á um hvort myndin sé frá lokum áttunda áratugs síðustu aldar eða byrjun þess níunda og var mikið rætt um það fyrir um 10 árum. Sú umræða hafði þó ekkert með þessa mynd að gera.

Föstudagsgetraun 2

2010-04-17T14:26:00.006+02:00

(#twitter) Þessi laugardagur er nú eiginlega bara framhald af föstudeginum í gær, því ég er enn fastur við vinnu gærdagsins. Þess vegna hljóma The Rolling Stones enn í græjunum. Og þess vegna er ráð að halda áfram með föstudagsgetraunina. Engin svör hafa borist. Siggi hefur eflaust verið upptekinn við annað.

1. vísbending: Myndin markar engin þáttaskil í kvikmyndagerð og er ekki hátt skrifuð í kvikmyndasögunni. Hún markar þó upphaf kvikmyndaferils tveggja þekktra Hollywood-leikara, karls og konu.

2. vísbending: Þáttur umræddrar leikkonu var ekki mikill í myndinni og henni skaut ekki upp á stjörnuhimininn fyrr en í næstu mynd sem hún lék í tveimur árum síðar.

Fór annars í búðina hér í morgun og á forsíðum allra dagblaðanna voru stríðsfyrirsagnir um öskuskýið yfir Evrópu. Ef marka má fyrirsagnirnar munum við flest deyja á næstu mánuðum.
Svo les maður um „tímabundnar afsagnir“ þingmanna. Aldrei er hægt að gera neitt almennilega á Íslandi. Tja, fyrir utan skýrslur. Við erum greinilega góð í því, því og eldgosum.

Föstudagsgetraun

2010-04-16T15:39:00.005+02:00

#twitter Það er föstudagur og af því tilefni, eins og flesta aðra föstudaga, hljóma The Rolling Stones í græjunum. Þess stundina er það Aftermath frá 1966. Æj hvað það er nú gott stykki.

En föstudögum fylgir líka önnur hefð. Föstudagsgetraunin sínvinsæla.

Eins og svo oft áður er spurt um kvikmynd.

1. vísbending: Myndin markar engin þáttaskil í kvikmyndagerð og er ekki hátt skrifuð í kvikmyndasögunni. Hún markar þó upphaf kvikmyndaferils tveggja þekktra Hollywood-leikara, karls og konu.

Hver er maðurinn

2010-04-14T11:31:00.003+02:00

Man einhver eftir þessum manni?

Rokk og ról

2010-04-03T20:13:00.002+02:00

The Oholics sitja nú í elhúsinu mínu og leika háværa rokkmúsik. Þetta er allt liður í verkefninu inmykitchen.

Ég held það hafi brotnað uppúr jaxli í mér. Systkin mín komu hingað um helgina. Jóhanna fór frá mér tímabundið og málaði Köben rauða. Páskar á morgun og svona. Og fokkins níu daga frí framundan

Undarlegt lið

2010-03-30T12:20:00.002+02:00

Það er undarlegt að heyra raddir úr stjórnarliðinu á Alþingi að fyrirhugðu fækkun og sameining ráðuneyta komi á óvart og séu ekkert á dagskrá ríkisstjórnarinnar. Þetta er sagt nokkuð berum orðum í stjórnarsáttmálanum.

Sigurðarmál og hlaupaannáll

2010-03-30T11:55:00.003+02:00

Það má kalla þenna dag í dag vordag, þrátt fyrir að hitinn hafi verið rétt yfir frostmarki þegar ég fór á fætur. Hann datt þó upp í tæpar tíu um ellefu og þá dustaði ég rykið af hlaupaskónum og dró fram níðþröngu joggingbuxurnar.

Nú er ég sveittur og sæll

30. mars fyrir þremur árum var eiginlega komið hálfgert sumar hér í bæ. osei.

Flugdýrtíð

2010-03-29T20:19:00.002+02:00

Það er sumsé dýrara fyrir mig að fljúga til Reykjavíkur héðan frá Gautaborg í júlí en að fara alla leið til Beirút. Ég hef svo sem lítið að sækja til Beirút og býst því við að ég endi með að bóka ferðina til Reykjavíkur.

100 kílókrónur fyrir okkur bæði í júlí.

Föstudagsgetraun 3

2010-03-26T16:23:00.003+01:00

Núnú, Sindri dúndraði inn réttu svari. Ánanaust var spurt um. Næsta vísbending átti að nefna að gatan hefur ekki alltaf heitið þessu nafni og að hún hafi áður verið hluti mun lengri götu. Svo átti að minnast á að öðrum megin í götunni væri nokkuð um íbúðarhús og byggingar en hinum megin væru nær engin mannvirki. Ástæðan fyrir því væri mestmegnis landfræðileg.

Sindri fær húrra!

#twitter

Föstudagsgetraun 2

2010-03-26T15:20:00.004+01:00

Strax komnar tvær ágætis tillögur. Báðar þó rangar.

Spurt er um götuheiti:

1. vísbending: Gatan er í Reykjavík og er kennd við gamalt örnefni.
2. vísbending: Umrætt örnefni var kennt við mann. Um þann mann er þó lítið eða ekkert vitað.

#twitter

Föstudagsgetraun

2010-03-26T14:40:00.004+01:00

Hallóhalló! Það er enn kominn föstudagur! Það merkir: Föstudagsgetraun. Ekki er spurt um kvikmynd að þessu sinni þó...

Spurt er um götuheiti:

1. vísbending: Gatan er í Reykjavík og er kennd við gamalt örnefni.

Hin eilífa lúppa

2010-03-24T12:27:00.002+01:00

Ég bössa og ég tvíta. Í bland feisbúkka ég líka. En ég bössa mest.

Á bössinu get ég skrifað færslur beint, þangað lenda líka færslur úr blogginu mínu og hlutir sem ég miðla á Google Reader. Færslur undir 140 stöfum fara svo sjálfkrafa úr Buzz yfir í Twitter.

Á Twitter get ég svo skrifað beint inn færslur. Þær færslur fara svo sjálfkrafa á Facebook og Buzz.

Nú er svo komið að ein færsla hjá mér er föst í lúppu. Ég byrjaði á því að skrifa hana inn í Buzz, hún fór svo í Twitter, sem sendi hana í Facebook og aftur á Buzz. Buzz sendi hana svo aftur á Twitter sem sendir hana svo aftur á Facebook og Buzz. Það tekur yfirleitt nokkrar klukkustundir fyrir færslurnar að berast úr Twitter yfir í Buzz. Þannig að sendingarnar eru ekki alveg stanslausar og stöðugar. En á nokkurra klukkustunda fresti birtist sama færslan á Buzz, Facebook og Twitter.

Þetta er magnað. Nú merki ég þess færslu með #twitter og við skulum sjá hvort hún lendi í sömu lúppu.

Að banna A til að koma í veg fyrir B

2010-03-23T16:47:00.003+01:00

Á Facebook rétt í þessu las ég ummæli við færslu um nýlegt bann við nektardansi á Íslandi. Þar segir einn ummælandi að honum finnist undarlegt að banna A til að koma í veg fyrir B. Þetta þykir mér undarlegt viðhorf.

Tilhvers er maður að banna einn hlut ef ekki til að koma í veg fyrir eitthvað annað? Ekki er maður að banna hlutinn bara til að banna hann (reyndar virðist það oft raunin á Íslandi, en það er líka asnalegt).

Ég er svo sem ekki mikið fyrir að stjórnvöld eigi að banna mikið. En margt er nauðsynlegt að banna, vegna þess að það hefur slæmar afleiðingar. Ekki það að nektardans á börum er svo asnalegt fyrirbæri að auðvitað á ekki að þurfa að banna hann. En fólk er fífl. Þess vegna þarf að banna.

Hins vegar er margt bannað sem er algjör della að banna. Afhverju má ég t.d. ekki kaupa mér Skjálfta í Nóatúni?

Sænsk orð I

2010-03-23T11:17:00.003+01:00

Ýmis sænsk orð eru fyndin. Ötli ég noti ekki blogginn þennan til að varpa ljósi á þau nokkur. Hið fyrsta fyrir valinu er:

knivhuggen

Sum sé lýsingarháttur þátíðar af sögninni knivhugga sem í beinni þýðingu á íslensku væri hnífhöggva.

Þetta þykir mér frábært orð. Það kemur býsna oft fyrir í fréttum hér. Menn eru hnífhöggnir hér hverja helgi að því er virðist. Menn eru líka stundum hnífstungnir (knivstucken), en þó yfirleitt hnífhöggnir. Hver munurinn er nákvæmlega á að vera hnífhöggvinn og hnífstunginn veit ég ekki. Jóhanna telur að það fari eftir beittu afli. Ég tel að það fari eftir hvernig haldið er á hnífnum, þ.e. hvort hnífsblaðið standi utan- eða innanhandar.

Stjórnarandstaða

2010-03-22T18:26:00.002+01:00

Ég held að orðið „stjórnarandstaða“ sé ákveðið vandamál í pólitík. Á Íslandi er minnihluti jafnan í stjórnarandstöðu. Þarf það að vera sjálfgefið að minnihluti sé jafnframt alltaf í stjórnarandstöðu?

Svarið kom

2010-03-21T18:23:00.002+01:00

Gundurinn svaraði rétt. Dances with Wolves var það heillin. Næsta vísbending átti að nefna óskarsverðlaun sem myndin hlaut eða var tilnefnd til og sú sjötta átti að nefna umrætt kvikmyndaform: Hollívúddepíkina, sem Kevin Costner tók upp aftur eftir nokkur hlé og var svo fest í sessi með Titanic James Camerons.

Föstudagsgetraun 4

2010-03-20T22:43:00.002+01:00

Leynist enn einn lesandinn að þessum bloggi. Helga Þórey segir Close Encounters of the Third Kind. Það er álíka rangt og fyrri svör. Þetta er greinilega níðþung getraun. Fjórða vísbending:

Spurt er um kvikmynd:

1. vísbending: Myndin þykir marka endurkomu tiltekins forms kvikmynda sem hafði verið vinsælt nokkrum áratugum áður.

2. vísbending: Myndin er fyrsta leikstjórnarverk leikstjórans. Almennt höfðu menn ekki mikla trú á verkefninu í byrjun. Myndin hlaut þó góðar viðtökur áhorfenda og gagnrýnenda.

3. vísbending: Söguþráður myndarinnar þykir afar svipaður þræði nýjasta afreks James Camerons, Avatar. Þá má nefna að hlutur James Camerons í endurkomu umrædds kvikmyndaforms er einnig stór.

4. vísbending: Kvikmyndin er í hópi svo kallaðra kúrekamynda, eða vestra. Það er þó ekki kvikmyndaformið sem rætt er um í fyrri vísbendingum. Enda hefur vestrinn eiginlega aldrei farið í pásu, þó vissulega hafi hann risið og hnigið í gegnum tíðina.

Föstudagsgetraun 3

2010-03-20T13:01:00.003+01:00

Það leyndist annar lesandi að þessari síðu. Einnig með rangt svar. Xenogenesis eftir James Cameron er ekki rétt. En fyrst O.Veigar nefnir Cameron skulum við blanda honum í dæmið:

Spurt er um kvikmynd:

1. vísbending: Myndin þykir marka endurkomu tiltekins forms kvikmynda sem hafði verið vinsælt nokkrum áratugum áður.

2. vísbending: Myndin er fyrsta leikstjórnarverk leikstjórans. Almennt höfðu menn ekki mikla trú á verkefninu í byrjun. Myndin hlaut þó góðar viðtökur áhorfenda og gagnrýnenda.

3. vísbending: Söguþráður myndarinnar þykir afar svipaður þræði nýjasta afreks James Camerons, Avatar. Þá má nefna að hlutur James Camerons í endurkomu umrædds kvikmyndaforms er einnig stór.

Föstudagsgetraun 2

2010-03-19T14:51:00.003+01:00

Eini lesandi síðunnar er búinn að giska. Hann gask á A Fistful of Dollars, með trega. Það er enda ekki rétt.

Spurt er um kvikmynd

1. vísbending: Myndin þykir marka endurkomu tiltekins forms kvikmynda sem hafði verið vinsælt nokkrum áratugum áður.

2. vísbending: Myndin er fyrsta leikstjórnarverk leikstjórans. Almennt höfðu menn ekki mikla trú á verkefninu í byrjun. Myndin hlaut þó góðar viðtökur áhorfenda og gagnrýnenda.

Föstudagsgetraun

2010-03-19T12:00:00.003+01:00

Ætli sé ekki réttast að halda í hefðir og skella hér fram föstudagsgetraun á endurreistum bloggi:

Spurt er um kvikmynd.

1. vísbending: Myndin þykir marka endurkomu tiltekins forms kvikmynda sem hafði verið vinsælt nokkrum áratugum áður.

Skráargatið

2010-03-18T12:04:00.004+01:00

Ég var að hlusta á Samfélagið í nærmynd í gær (þökk sé IE-flipanum). Þessi þáttur er frábær að því leyti að þar er stöðugt verið að benda á góða hluti og hvað mætti betur fara í íslensku samfélagi. Þáttastjórnendur virðast hafa svipaðan áhuga og ég á endurvinnslumálum, skipulagsmálum, hollustumálum o.þ.h. Um daginn var t.d. verið að ræða um tækifæri í íslenskum landbúnaði sem felast í að selja beint frá býli og leggja áherslu á verslun í heimabyggð. Meira um það seinna. Í gær var hins vegar verið að ræða um skráargatið, í kjölfar umfjöllunar í neytendablaðinu. Merkið þekki ég vel, enda upprunnið í Svíþjóð, og ég kíki iðulega eftir því þegar ég versla matvöru.
Í umfjöllun neytendablaðsins kemur fram að búið sé að taka merkið upp í Noregi og Danmörku auk Svíþjóðar. Íslensk stjórnvöld hafi verið hvött til að vera með en af því hafi ekki orðið. Í máli talsmans neytendasamtakanna í Samfélaginu í gær kom fram að það væri aðallega vegna þess að íslenskir framleiðendur væru á móti því. Þetta þótti mér allrar athygli vert og finnst ástæða til að kanna betur. Hvers vegna vilja íslenskir framleiðendur ekki merkja vörurnar sínar með sérstöku hollustumerki? Er það vegna þess að íslensk matvæli eru upp til hópa óholl? Erum við ekki alltaf að grobba okkur af því hvað íslenskur matur sé góður og að matvæli frá öðrum löndum séu beinlínis hættuleg? Hvað er málið?

Sigurðarmál

2010-03-17T15:45:00.004+01:00

M.ö.o. veðurblogg!

Tryggir og minnugir lesendur þessa bloggs ættu að kannast við hina árlegu vorumfjöllun mína. Undanfarin ár hef ég, að mestu ómeðvitað þar til í fyrra, skráð samviskusamlega vorkomu hvar ég bý hverju sinni. Hún hefur yfirleitt verið um þetta leyti. Í miðjum mars. Hér í Gautaborg í hið minnsta.
Nú er miður mars og gott betur en ekki er hægt að segja að það bóli mikið á vorkomu. Snjóskaflar sjást utan við gluggann minn, himininn er vetrargrár og hitinn rétt ullast uppyfir núll eða lafir í fimmunni yfir hádaginn. Ekki er hægt að sjá að veðurkortin boði nokkuð gott í þessum efnum á næstunni.
Við, heimilisfólkið á Godhemsplatsen 2B, íbúð 40, erum fyrir löngu orðin þreytt á þessum vetri. Jafnvel ég sem þó slapp í vorloftið á Íslandi um stund. Langþráð er vorið.

IE í Chrome

2010-03-16T20:30:00.003+01:00

Ég nota Google Chrome. FireFox hætti að virka hjá mér af einhverjum óútskýranlegum ástæðum. Ég hatast við InternetExplorer. Hins vegar eru nokkrir aular sem sníða vefina sína enn eingöngu að IE. T.d. Rúv, sem ég fer oft inn á. Það er ekki hægt að spila útvarpið eða sjónvarpið með Chrome. Í kjölfarið hætti ég eiginlega að horfa eða hlusta á Rúv. Síðan fann ég þetta. Viðbót við Chrome sem gerir manni kleift að opna IE inni í flipa án þess að þurfa að yfirgefa Chrome. Það er meir að segja hægt að kenna skepnunni að opna Rúv í þannig flipa. Þá þarf ég bara að slá ruv.is inn í Chrome og babbarei: Ég get hlustað á rúv án nokkurra vandræða.

Þetta er gott. En vefstjórinn hjá Rúv ætti nú samt að gera vefinn Chrome-hæfan

2010-03-15T10:25:00.003+01:00

Ég er búinn að hitta talsvert af Svíum hérna í Svíþjóð. Eðlilega. Líka búinn að hitta Hollending og Breta. Iðulega kemur þjóðaratkvæðagreiðslan um daginn upp í samræðum og einhverjar spurningar um Icesave. Allir sem ég tala við standa í þeirri trú að kosningin hafi snúist um það hvort Íslendingar ætluðu að borga eða ekki. Ég reyni svona að útskýra að líklega hafi einhverjir kosið með því hugarfari en í raun snerist málið alls ekki um það. Þessi staðreynd virðst stórlega hafa skolast til því ef maður les fréttir um málið hér í Svíþjóð kemur hið rétta alltaf fram. Fólk heyrir líklega bara það sem það vill heyra.

Annars sá ég Lísu í Undralandi á föstudaginn. Allan timann hugsaði ég: „Hemmi Gunn,það sem hægt er að gera nú til dags!“

Endurlífgun bloggsins (einu sinni enn)

2010-03-12T08:47:00.004+01:00

Kæru lesendur (sem sagt Siggi og Berglind)

Enn einu sinni held ég á vit endurlífgunartilrauna bloggsins. Þeir sem fylgst hafa með þessum bloggi (já, beygist eins og lókur) vita að slík umsvif eru ekki endilega merki um tíðari færslur eða vitsmunalegri umræðu hér. Mestmegnis bara fikt og dund af minni hálfu við að skoða nýjar víddir netsins.

En sjáum til.

Annars tók ég upp á því í gærkvöldi að búa mér til sinnep. Það er bæði einfalt og flókið. Sérlega einföld uppskrift en sérlega flókið að ná hlutföllunum rétt. Enn flóknara verður dæmið þar sem sinnep er þess eðlis að það er eiginlega ekki hægt að smakka sig áfram. Eftir þriðja smakk er maður eiginlega búinn að missa allt bragðskyn. Fyrir nú utan að sinnep nær ekki rétta bragðinu fyrr en töluvert eftir blöndun, það þarf að fá að setjast aðeins og jafna sig.

En svona er uppskriftin mín nokkurnvegin:

Sinnepsduft (enskt)
Kalt vatn (sænskt)
Eplaedik (sænskt)
Viskí (japanskt, sjá fyrri færslu)
Salt (franskt)
Basillika (uppruni óþekktur)
Chili pipar (þýskur)
Hunang (danskt)

Hlutföllin eru meira eða minna einn hluti vökva á móti tveimur af dufti. Svo er bara að passa að hafa ekki of mikið af ediki og viskíi á kostnað vatns og að edikið og viskíið vegi ekki út hvort annað. Hunang svo bara eftir því hversu sætt sinnepið á að vera. Eiginlega ætti að vera smá hvítvín í þessu líka, en ég átti ekkert hvítvín í gærkvöldi útaf helvítis sýstembólaginu.

Nördafærsla: Yamazaki

2010-03-10T14:53:00.006+01:00

Eftir að hafa verið eiginlega fastur í Islay viskíi frá byrjun, með smá Speyside útúrdúrum af og til hafði ég mig loks í að kaupa eitthvað nýtt og skemmtilegt. Fjárfesti í einni japanskri um daginn: Yamazaki. Það var kannski einkum verðflokkurinn sem leiddi mig út í þau ævintýri. Sum sé frekar í ódýrari kantinum. Settist niður til að smakka í gærkvöldi:

Nös: Einkennandi viðarkeimur og síðan hunang og sítrus sem slæðist inn eftir því sem nefið mýkist. Jafnvel örlítil vanilla og kanill þarna einhversstaðar.

Palata: Viðarstemmingin ennþá ráðandi. Sítrusinn fylgir á eftir eins og áður. Ekki laust við smá seltu í lokin. Töluvert bit í því, enda bara 10 ára gemlingur.

Eftirbragð: Kemur skemmtilega á óvart eftir frekar mikla hógværð í nös og palötu. Ekkert sérlega ríkt, en milt, olíukennt með hunangskeim. Kallar strax á meira.

Dulræna deildin er góð mynd

2010-02-22T19:45:00.004+01:00

Men who stare at goats
(ísl. Dulræna deildin)

Ég sá hana um daginn og þótti hún skemmtileg. En hvers vegna? Hvað er það við þessa mynd sem vakti hjá mér gleði, ánægju og kæti? Tínum saman nokkra punkta:

George Clooney. Árið 1996 um vorið var ég í veislu og sagði eftirfarandi: George Clooney er frábær leikari. Þá spunnust samræður um gildi Georgs sem kvikmyndaleikara. Þær enduðu á því að ég sagði: Sannið þið bara til. Allir sem tóku þátt í þeim umræðum hafa fyrir löngu sannað til.

Jeff Bridges. Uppáhaldsleikari mömmu minnar. Fleiri orð þarf ekki um það að hafa.

Bandaríski herinn. Mynd sem fjallar um bandaríska herinn á 50% möguleika á að vera frábær. 25% á að vera góð. Aðeins 25% líkur eru á að slík mynd sé slæm/slök/slöpp. Takið eftir að lýsingarorðið leiðinlegur er ekki notað hér. Góð mynd getur verið leiðinleg (Color Purple). Vondar myndir geta verið skemmtilegar (Veggfóður).

Sagan. Saga sem flippar getur annað hvort flippað út eða flippað inn. Tja, nema að hún flippi á staðnum. Dulræna deildin flippar í allar áttir. Það er gott. Það er gjöf.

Geitur. Geitur, kindur, kýr og lamadýr eru fyndin. myndir sem sýna svoleiðis fá prik.

Yfirnáttúrulegir hæfileikar. Carrie, Star Wars, Shining, Spiderman, Sixth Sense, Transformers og Jaws. Eðalinnihaldsefni.

Þess vegna þótti mér Dulræna deildin frábær og segi við þig: Sjáðana!!

Huuu? Bloggfærsla

2010-02-22T18:25:00.003+01:00

Ha. Nei, bíddu, bíddu. Bloggfærsla hér? Ja, hérna, hér!

Er ekki löngu kominn tími á eina góða bloggfærslu á gamla góða blogger.com. Það held ég nú. En um hvað skal rætt? Hvað liggur mér á hjarta? Hugleikur, segðu mér, segðu mér hvað ég á að blogga um... (Hugleikur hugsar, hann andvarpar). "Ég er nú sjálfur að reyna eitthvað að blogga hér," svarara Hugleikur, fær sér sopa af bjór, og geiblar munninn.

"Ég er svo vinsæll," segir hugleikur, "hlær og grípur um munn sér".

Hugleikur vandræðast en ég blogga bara.

Tölum um sögnina eignast. Hana ætti ekki að nota í boðhætti. Eignastu. Nei það er nú ekki alveg málið. En hvað með sögnina fá. Fáðu... fáðu hold. Nei það er ekki gott. Fáðu þér hins vegar. Upplifa! Upplifðu Toyota bíla. Eignastu Toyota, upplifðu frelsi og fáðu hugarró.

Lofið mér krakkar mínir, að nota þessar sagnir aldreigi í boðhætti.

Stranger than paradise

2009-04-08T15:39:00.002+02:00

Gummi gat þetta. Kannski var síðasta vísbendingin full ítarleg. Svona miðað við hvað hinar voru loðnar. Hefði mátt bíða með Iggy Pop og Tom Waits.

En þetta var sum sé Stranger than paradise í leikstjórn Jim Jarmusch.

Föstudagsgetraun - 4. vísb.

2009-04-07T17:08:00.002+02:00

Ekki kom svarið á föstudaginn. Svo við höldum bara áfram. Komin eru nokkur gisk. Pulp Fiction, Bottle Rocket, Dirk Diggler. Ekkert rétt.

1. Vísbending: Að venju tengist getraunin kvikmyndaheiminum. Spurt er um kvikmynd. Hún er annað leikstjórnarverk leikstjórans.

2. Vísbending: Myndin er í raun stuttmynd en varð seinna fyrsti þáttur í þriggja þátta kvikmynd með sama heiti.

3. Vísbending: Með lengri útgáfu myndarinnar markar leikstjórinn sér einkenni sem er ríkjandi í seinni myndum hans. Kvikmyndir þar sem nokkrar ólíkar sögur eru sagðar sem tengjast með einum eða öðrum hætti.

4. Vísbending: Leikstjórinn er í hópi svo kallaðra óháðra leikstjóra og hefur fengið til liðs við sig nokkra af skærustu stjörnum óháðrar kvikmyndgerðar, t.d. Johnny Depp, Winonu Ryder, Steve Buscemi, Forest Whitaker og Bill Murray. Einnig hafa Tom Waits og Iggy Pop komið oftar en einu sinni fram í myndum hans. (nú hafið þið eitthvða til að gúggla.)

Föstudagsgetraun - 3. vísb.

2009-04-03T16:51:00.002+02:00

Jæja, komin tvö gisk. Hvorugt rétt.

Þriðja vísbending ætti að kasta nokkru ljósi á málið:

1. Vísbending: Að venju tengist getraunin kvikmyndaheiminum. Spurt er um kvikmynd. Hún er annað leikstjórnarverk leikstjórans.

2. Vísbending: Myndin er í raun stuttmynd en varð seinna fyrsti þáttur í þriggja þátta kvikmynd með sama heiti.

3. Með lengri útgáfu myndarinnar markar leikstjórinn sér einkenni sem er ríkjandi í seinni myndum hans. Kvikmyndir þar sem nokkrar ólíkar sögur eru sagðar sem tengjast með einum eða öðrum hætti.

Föstudagsgetraun - 2. vísb.

2009-04-03T14:10:00.002+02:00

Klukkutími liðinn og ekkert svar hefur borist. Kominn tími á 2. vísbendingu:

1. Vísbending: Að venju tengist getraunin kvikmyndaheiminum. Spurt er um kvikmynd. Hún er annað leikstjórnarverk leikstjórans.

2. Vísbending: Myndin er í raun stuttmynd en varð seinna fyrsti þáttur í þriggja þátta kvikmynd með sama heiti.

Dauði og djöfull - Föstudagsgetraun

2009-04-03T13:01:00.004+02:00

Ég var einn af ánægðustu viðskiptavinum í íslenska bankakerfinu, skv. fjölmörgum auglýsingum. Ég þurfti að minnsta kosti ekki að kvarta. En núna er bankinn minn ekki til lengur og ég er viðskiptavinur Kaupþings.

Fyrsta reynsla af nýja bankanum er ekki góð. Hjá SPRON þurfti ég aldrei að bíða nema örfáar sekúndur til að fá samband við þjónustufulltrúa. Eftir um fimm mínútna bið í símanum áðan gafst ég upp.

En hvað um það. Vettvangur.com ætlar að fara vel af stað. Auðvitað bregst Sigurður ekki með málræpuna og dælir þarna inn skrifum. Gott hjá honum.

Hver veit nema að ég hendi inn grein að loknum vinnudegi.

Nú eru barirnir farnir að opna útiserveringuna hjá sér. Við nýttum okkur það á Linné-terrössunni í gærkvöldi.

Hel fínt.

Síðasta föstudagsgetraun var hálf mislukkuð. Nú, þar sem ég veit hversu skarpir lesendur þessa bloggs eru, hendi ég framm einni svínþungri.

1. Vísbending: Að venju tengist getraunin kvikmyndaheiminum. Spurt er um kvikmynd. Hún er annað leikstjórnarverk leikstjórans.

vettvangur.com

2009-03-31T00:10:00.002+02:00

Ég notaði helgina í að búa til vef. Vettvangur.com heitir hann og er Sigurður Ólafsson upphafsmaður hans. Þar ætlum við Siggi, og vonandi fleiri, að skrifa um okkar hugðarefni þegar lausar stundir gefast. Siggi verður án efa þúsund sinnum framtakssamari en ég enda getur hann röflað og tuðað endalaust um hvað sem er, fyrir nú utan það að hann er atvinnulaus og hefur því ekkert betra að gera.

Annars var það ekki það eina sem gerðist um helgina, á föstudeginum sátu hér Jóhanna og Lotta og gerðu lokaátak í ferðahandbókinni um Gautaborg sem þær hafa verið að skrifa undanfarið. Bókin sú er byggð á efninu á Monthly.se (annar vefur sem ég smíðaði). Um kvöldið kíktum við út á lífið og enduðum í kólumbísku partíi einhversstaðar í ólöglegum næturklúbbi. Þetta hljómar reyndar skuggalegra en það er í raun.

Á laugardeginum fórum við í tveggja og fimm ára afmælisveislu. Það voru systkini Jóhönnu sem eltust um ár. Jóhanna yfirgaf mig um kvöldið í vinnuferð með Lottu svo ég þurfti að sjá um mig sjálfan. Sötraði bjór sem ég stal frá pabba Jóhönnu og viskí sem ég átti fyrir á meðan ég duddaði í vefmálum. Sunnudagurinn fór svo í hörkugöngutúr gegnum Slottsskogen og oníbæ og til baka. Á ferðalaginu nældi ég mér í Konungsbók eftir Adda Indriða. Lá svo fyrir og kláraði hana næstum því.

Eitthvað fór helgin samt skakkt oní mig því ég vaknaði í morgun hundveikur og er það enn. Lá fyrir meir og minna eftir hádegi og fram á kvöld.

Æ svei. Vonum að þetta hrökkvi af mér í nótt.

Clint Eastwood

2009-03-27T13:19:00.002+01:00

Jú, þetta var of augljóst.

Sverrir gat

Þess má geta að þegar ég fæ útborgað ætla ég að rölta í Specsavers og kaupa mér gleraugu sem heita Clint. Það þykir mér töff.

Aukaspurning: Hver er uppáhaldsmyndin mín í leikstjórn Eastwood?

Föstudagsgetraun

2009-03-27T11:08:00.003+01:00

Það er föstudagur og þarf ekki að spyrja hverjir fá að verma stereógræjurnar í dag.

Reyndar datt annar hátalarinn út um daginn svo ég spila þá í mónó.

Í fréttum er þetta helst að ég er búinn að tapa auðkennislyklinum fyrir heimabankann.

oh well

Föstudagsgetraunin:

Spurt er um kvikmyndaleikstjóra. Hann er karlmaður og fæddist á fyrrihluta síðustu aldar.

Vísindaleg vinnubrögð

2009-03-26T14:38:00.003+01:00

Í menntaskóla lærði ég einhver vinnubrögð um það hvernig ætti að orða spurningar í könnun. Eitt atriði var að hafa þær ekki leiðandi.

Núna er ég að hlusta á viðtal við ritstjóra heimasíðu félags leiðsögumanna. Það er í kjölfar mjög neikvæðrar einkunnar sem Geysissvæðið fékk í könnun á þeirri síðu. Það er vissulega fréttnæmt í sjálfu sér. En þegar í ljós kemur að spurning könnunarinnar var:

„Er Geysissvæðið subbuleg slysagildra sem er íslenskri ferðaþjónustu til skammar?“

Þá er kannski ekki undarlegt að niðurstaðan hafi verið neikvæð fyrir Geysissvæðið.

Bleika gullið og kjötrósirnar

2009-03-24T12:07:00.000+01:00

Ég sá þennan þátt á SVT um daginn, um eldislaxinn norska og fiskimjölið íslenska. Aulahrollur held ég að nái ekki að lýsa tilfinningunni.

Í kjölfarið sendi ég póst á helstu fjölmiðla landsins og tippsaði um þáttinn.

Var það kannski þessvegna sem þetta var í fréttaaukanum um daginn?

Vorvísa

2009-03-19T16:38:00.002+01:00

Þessi er akkúrat fimm ára gömul. Hún á akkúart jafnvel við núna hér í Gautaborg og í Amsterdam 15. mars 2004.

Það er sólskin úti og sumarhjörtun tifa,
syngjandi fuglar á trjánum allt í kring.
Á degi sem þessum er dásamlegt að lifa
svo dansandi glaður af ánægju ég syng.

Seisei já!

Köben um helgina. Það er klárt mál.

Frekari skuld

2009-03-18T11:48:00.001+01:00

Hmmm eru þetta 3.444.302 krónur sem ég skulda aukalega vegna bankahrunsins?

Má ég sparka

2009-03-17T18:52:00.000+01:00

Það má nú bara vera að maður sé að fara að kíkja á jútú í sumar.

svei mér

Annálar

2009-03-15T21:43:00.004+01:00

Gildi bloggins verða mér ljós um þetta leyti á hverju ári. Ég er nefnilega stundum veðurbloggari, einkum þegar veðrið er gott. Ég hef náð, kannski fyrir tilviljun, að dokúmentera á hverju ári, vorkomuna.

Í dag röltum við Jóka niður í bæ. Við höfðum litið út um gluggan þegar við röltum á fætur um morguninn og sagt hvort við annað: Vorið er víst bara komið.

Á leiðinni í bæinn vorum við að velta því fyrir okkur hvort það væri ekki nokkuð fyrr á ferðinni en vanalega. Reyndum að rifja upp hvenær vorið bankaði á í fyrra. Þá hugsaði ég með sjálfum mér að ég gæti eflaust flett því upp á blogginu mínu.

Viti menn: Þann 4. mars í fyrra rita ég langa skýrslu um þessi mál, í tilefni af því að mér finnst vorið vera að koma. "Styttist í það?" Nefnist færslan

12. mars 2007 reit ég færslu með heitinu "Nálgast vorið?". 24. mars tala ég svo um fyrsta opinbera vordaginn.

2006 var ég á Íslandi og skrifaði ekkert um vorkomu, enda ekkert vor á Íslandi, bara vetur og sumar.

2005 var ég í Amsterdam. Ég tilkynni um vorkomu þann 15. mars, sem er nú svipað og hér í Gautaborg síðustu tvö ár, þrátt fyrir að liggja töluvert sunnar. Ég held hins vegar að skilgreining á vori hafi verið nokkuð strangari hjá mér þá, því fyrsta vordaginn tilkynnig ég um 19 gráður (á móti 9 gráðum í Gautaborg).

Árið 2004 skrifa ég vorfærslu 1. mars og 17 mars held ég því hreinlega fram að sumarið sé komið.

Lengar aftur nær ekki þetta blogg. Enda hafði ég fram að því verið á Íslandi á "vorin".

En sum sé. Vorið hefur síðustu árin komi um miðjan mars. Eins og í ár

Búinn með skattinn

2009-03-08T13:46:00.002+01:00

Það var ekki lengi gert að fylla út skattaskýrsluna. Ég verð að segja að myndin er ekki allt of dökk.

Tekjur á árinu 3.500.000
Eign í lok árs 1.100.000
Skuld í lok árs 1.500.000

Ég á lítið, skulda lítið og þéna lítið. Það er einfalt og gott.

Heimasími

2009-03-03T14:53:00.002+01:00

Eftir tvö ár hér í Gautaborg erum við loks búin að fá okkur heimasíma. Það var gert í því skyni að lækka internetkostnaðinn (heimasími+internet+farsími hjá sama fyrirtækinu lækkar mánaðarnetgjaldið um helming). Þannig að við erum komin með heimanúmer:

031 194 237

Gjörsamlega galið númer. Svo þurfum við að grafa upp símtækið uppi á háalofti til að hægt sé að hringja í okkur. En endilega prófa.

Bless bless

Svo merkilegt lið

2009-02-04T12:27:00.001+01:00

Það er alveg merkilegt að menn (aðallega sjálfstæðismenn) skuli ennþá nenna að hlaupa stjórn Seðlabankans til varnar.

Pólitískar hreinsanir, einelti, hatur, heift segja þeir. Á málflutningi sjálfstæðismanna nú virðist nokkuð ljóst að það stóð aldrei til að stokka upp í Seðlabankanum. Sameina hann fjármálaeftirlitinu segja þeir, líklega með því að fella fjármálaeftirlitið inn sem deild í bankanum. En að láta stjórnina víkja og hætta þessu rugli með þrjá pólitískt skipaða bankastjóra kom greinilega ekki til greina. Alveg eins og það kom aldrei til greina að neinn innan sjálfstæðisflokksins myndi segja af sér eða yfir höfuð taka á sig einhverja ábyrgð.

Krafa mótmælenda síðustu vikur og mánuði var uppstokkun í kerfinu. Allstaðar, í ríkisstjórn, fjármálaeftirliti, seðlabanka, í bönkunum og á Alþingi. Það eina sem er óbreytt er Seðlabankinn (sem nú virðist ætla að breytast). Allir sýndu þessum kröfum skilning, nema sjálfstæðismenn. Það þykir mér bara svo merkilegt.